Assalomu alaykum, muhtaram mehmonlar!

Qadrli vatandoshlar!

Hurmatli xonimlar va janoblar!

Bugungi shukuhli oqshomda sizlar bilan serquyosh O‘zbekistonda, Vatanimizning bebaho gavhari bo‘lmish azim Samarqand shahrida ko‘rishib turganimdan baxtiyorman.

Avvalambor, YUNЕSKO shafeligida o‘tkazilayotgan “Sharq taronalari” xalqaro musiqa festivaliga tashrif buyurgan siz, muhtaram san’at namoyandalariga, nufuzli faxriy mehmonlarimizga, xorijiy davlatlarning elchilari va xalqaro tashkilotlar vakillariga, ommaviy axborot vositalari xodimlariga chuqur minnatdorchilik izhor etaman.

Barchangizga samimiy hurmat-ehtiromimni bildirib, butun O‘zbekiston xalqining salomi va ezgu tilaklarini yetkazishga ijozat bergaysiz.

Muhtaram festival ishtirokchilari!

Pandemiya tufayli yuzaga kelgan besh yillik tanaffusdan so‘ng o‘tayotgan “Sharq taronalari” festivalini san’atkorlar ham, muxlislar ham birdek sog‘ingan, desam, haqiqatni aytgan bo‘laman. Shu bois, bugungi san’at bayrami barchamizni yangicha ruh va shukuh bilan o‘ziga chorlamoqda.

Mamlakatimizda o‘n uchinchi bor o‘tkazilayotgan ushbu anjuman garchi “Sharq taronalari” deb atalsa-da, bugungi kunda u mohiyat e’tiboriga ko‘ra, “Jahon taronalari” festivaliga aylanganiga barchamiz guvohmiz.

Bu haqiqatni birinchi festivalda 31 ta mamlakat vakillari qatnashgan bo‘lsa, bu yil barcha qit’alardagi 80 ga yaqin davlatdan 400 nafardan ziyod san’atkor va olimlar ishtirok etayotgani ham tasdiqlaydi.

O‘tgan davr mobaynida Samarqandning yulduzli osmoni ostida qanchadan-qancha sehrli navolar, hayotbaxsh ohanglar yangradi. Ko‘hna Sharq bag‘rida tug‘ilgan musiqiy qadriyatlar anjumanimiz tufayli xalqaro miqyosda keng e’tibor va e’tirof qozondi. Festival o‘nlab mahoratli xonanda va sozandalarni, iste’dodli yoshlarni kashf etdi, ularning parvoziga qanot, ijodiga kuch va ilhom bag‘ishladi.

Qadrli do‘stlar!

Dunyodagi jamiki xalqlar qatori o‘zbek eli ham tinchlik va osoyishtalikni yuksak qadrlaydigan, oqko‘ngil va bag‘rikeng xalqdir. Yangi O‘zbekiston tashqi siyosatining tub mohiyatini ham turli davlatlar bilan tinchlik va hamkorlik, do‘stona munosabatlarni rivojlantirish tamoyili tashkil etadi.

Shu ma’noda, yurtimizda “Sharq taronalari” anjumani bilan birga, xalqaro maqom san’ati, baxshichilik san’ati, hunarmandchilik festivallari, folklor va raqs san’ati bo‘yicha “Buyuk ipak yo‘li”, “Lazgi” xalqaro festivallari, Toshkent xalqaro kinofestivali singari yirik madaniy tadbirlar muntazam o‘tkazib kelinmoqda. Ular, ta’bir joiz bo‘lsa, O‘zbekistonning jahon ahlini tinchlik-totuvlikka, qardoshlik va ahillikka chaqiradigan ezgu da’vatidir.

Bunday chorlov hozirgi vaqtda g‘oyat muhim ahamiyatga ega. Chunki bugun ko‘z o‘ngimizda dunyoning butunlay yangi, beqaror, xavotirli geosiyosiy va geoiqtisodiy arxitekturasi shakllanmoqda. Turli mamlakatlar o‘rtasida nizo va adovatlar, qarama-qarshilik, ishonchsizlik muhiti kuchaymoqda. Jamiyatlar ichida ma’naviy tanazzul ildiz otmoqda. Notinch va tahlikali zamonda azaliy qadriyatlarni, odamiylik qiyofasini saqlab qolish tobora mushkul bo‘lib bormoqda.

Mana shunday murakkab vaziyatda ilohiy sarchashmalardan quvvat olib, vaqt va makon chegaralari osha gumanistik ideallarni tarannum etadigan asl san’at, musiqa va adabiyot xaloskor kuch bo‘lib maydonga chiqishi zarur.

Bugun biz tanlagan yo‘l kelajagimiz va taqdirimizni belgilaydi. Bu ko‘hna dunyo tinchlik va do‘stlik bilan yashnaydi, yasharadi. Insonlar, xalqlar va davlatlar o‘rtasidagi hamjihatlikni esa, birinchi navbatda, sizlar kabi ezgu niyatli ijodkorlar, sizlarning hamfikr va birdamligingiz, adabiy-madaniy hamkorlik mustahkamlaydi.

Aziz do‘stlar!

Mana shu muhtasham maydonda mag‘rur hilpirab turgan bayroqlarga qarang! Qaysi mamlakat, qaysi xalq timsollarini ko‘rmaysiz bu yerda! Ular ifoda etadigan ranglar jilosi va garmoniyasi, festivalda yangraydigan kuy va qo‘shiqlar barchamizning ko‘nglimizdagi olijanob orzu-intilishlar bilan uyg‘un va hamohangdir. Shu holatning o‘zi ham insoniyatning asli va nasli bir ekanidan dalolat bermaydimi?

Mana shunday ezgu va ulug‘ maqsadlarni o‘z hayotining mazmuni deb bilgan siz, azizlarni – yetti iqlimdan kelgan tinchlik va do‘stlik elchilarini bugun mehmondo‘st va ma’rifatli Samarqand ahli, butun O‘zbekiston xalqi bag‘rini ochib qarshi olmoqda.

Bizning xalqimiz azal-azaldan san’atga mehr va ixlos qo‘yib yashaydi, musiqani inson ruhining ilohiy quvvati deb biladi. Buyuk Sharq mutafakkirlari musiqa ilmi va tarixi, maqom san’ati, cholg‘u sozlari haqida ajoyib asarlar yaratganlar. Biz barchamiz mana shunday o‘lmas madaniy merosning vorislarimiz. Binobarin, bu ulkan merosni birgalikda o‘rganish va keng targ‘ib etish, uni kelgusi avlodlarga bezavol yetkazish oldimizda turgan eng muhim vazifadir.

Shu ma’noda, betakror Samarqand zaminida dunyoning taniqli ilm-fan va madaniyat arboblari ishtirokida mamlakatimizning madaniy merosini o‘rganish, saqlash va ommalashtirish bo‘yicha kuni kecha o‘tkazilgan navbatdagi xalqaro ilmiy kongress muhim amaliy qadam bo‘ldi.

Ushbu anjumanda mamlakatimiz madaniy-gumanitar hayotida o‘ziga xos megaloyiha bo‘lgan O‘zbekistondagi Islom sivilizatsiyasi markazi faoliyatini takomillashtirish bo‘yicha yangi g‘oya va tashabbuslar, qimmatli taklif va tavsiyalar bildirilgani bizni albatta mamnun etadi.

Ayniqsa, muqaddas musulmon dinining gumanistik mohiyatini ochib berish, islom avvalo ezgulik, tinchlik, ilm-ma’rifat va madaniyat ta’limoti ekanini yana bir bor ta’kidlash, islomofobiya ko‘rinishlariga barham berishga qaratilgan sa’y-harakatlar nihoyatda dolzarbdir.

Fursatdan foydalanib, bugungi tantanamizda ishtirok etayotgan, O‘zbekistonning chinakam do‘stlari bo‘lgan ushbu kongressning hurmatli a’zolariga jonajon Vatanimiz, xalqimizga ko‘rsatayotgan yuksak hurmat va e’tiborlari uchun chin qalbdan minnatdorlik bildiramiz.

Qadrli do‘stlar!

Bugungi kunda “Sharq taronalari” festivalining tarixi va an’analarini, Sharqning boy va rang-barang musiqiy madaniyatiga doir ma’lumotlarni o‘zida mujassam etadigan alohida ensiklopediya va uning virtual shakli – ko‘p tarmoqli axborot platformasini yaratishning vaqti keldi, deb hisoblayman.

Men ushbu qomusni tayyorlashda, jahonning turli muzey va kutubxonalari, arxiv va fondlarida tarqoq holda saqlanayotgan qimmatli ma’lumotlarni to‘plash, ularning yagona bazasini yaratish va kelajak avlodlarga yetkazishdek ezgu va xayrli ishda barchangiz faol ishtirok etasiz, deb ishonaman.

Shu bilan birga, yurtimizda shakllangan ijobiy tajribadan kelib chiqqan holda, ushbu anjumanimizning ko‘lami va jozibasini yanada oshirish maqsadida “Sharq taronalari” festivalining xalqaro Do‘stlar klubini tashkil etishni taklif qilaman.

Ma’lumki, har bir festival davomida yangi-yangi musiqiy asarlar yaratiladi, muxlislar qalbidan joy oladigan dilbar kuy-qo‘shiqlar ijro etiladi. Afsuski, mana shunday noyob taronalar ko‘pincha faqat bir anjuman doirasida yangraydi, xalqaro miqyosda keng targ‘ib qilinmaydi. Shu bois, festivalimizning barcha g‘olib va sovrindorlari ishtirokida dunyo mamlakatlarining nufuzli sahnalarida katta-katta konsert dasturlarini namoyish etish taklifini bildirsam, o‘ylaymanki, sizlar ham bu fikrni qo‘llab-quvvatlaysizlar.

Muhtaram anjuman qatnashchilari!

“Sharq taronalari” festivali betakror Registon maydonida, “Yer yuzining sayqali” deb nom qozongan, asrlar bo‘yi o‘z tarovati va jahonshumul shuhratini saqlab kelayotgan afsonaviy Samarqand shahrida o‘tkazilishi albatta bejiz emas.

Bundan ming yil avval Sharqning mashhur shoiri Abul-Fath al-Bustiy “Bu dunyo jannatining nomi erur Samarqand”, deb yozgan edi. Bu haqqoniy baho nafaqat tarixiy, balki zamonaviy Samarqand uchun ham  bag‘oyat mos va munosibdir.

O‘tmishda qanchadan-qancha karvon yo‘llari o‘tgan, qanday buyuk tarix va madaniyat yaratgan, shaharlar sarvari Samarqand bugun yana navqiron qiyofa kasb etib, dunyo hamjamiyatiga tinchlik salomini yo‘llab turibdi.

Festival sharofati bilan xorijdan kelgan mehmonlarimiz Samarqandni yana bir bor o‘zlari uchun kashf etar ekanlar, ne-ne shoirlar, ne-ne hofizlar kuylagan bu muazzam shaharning bugungi jamoli, ochiqko‘ngil va saxovatli xalqimizning ezgu fazilatlari ularni albatta o‘ziga maftun etadi, deb ishonamiz.

Fursatdan foydalanib, anjuman doirasida o‘tkaziladigan “Sharq xalqlari musiqa madaniyati: globallashuv jarayonlarida ijodiy uyg‘unlashuv tamoyillari” mavzusidagi xalqaro ilmiy-amaliy konferensiya ishiga muvaffaqiyat tilayman.

Bugungi san’at bayramini yuqori saviyada tashkil etishga hissa qo‘shgan, o‘z kasbining ustasi va fidoyisi bo‘lgan barcha insonlarga, mehnatkash va olijanob, mehridaryo Samarqand ahliga chin yurakdan tashakkur bildiraman.

Dillarni dillarga, ellarni ellarga bog‘laydigan “Sharq taronalari” olam uzra hamisha baralla yangrasin!

Festivalning barcha ishtirokchilariga omad va yutuqlar yor bo‘lsin!

Joriy yilning 28-mart kuni Samarqand shahar Registon maydonida O‘zbekiston Respublikasi Prezidentining 2024-yil 12-yanvardagi “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari to‘g‘risida”gi PF-9-son Farmoni hamda O‘zbekiston Respublikasi Vazirlar Mahkamasining 2024-yil 7-oktyabrdagi “O‘zbekiston bo‘ylab sayohat qil!” ichki turizm yarmarkasini tashkil etish va o‘tkazish chora-tadbirlari to‘g‘risida”gi 646-sonli qarori ijrosini ta’minlash maqsadida ichki turizm yarmarkasi tashkil qilindi.

Yarmarkada 200 ga yaqin respublikamizda faoliyat yurituvchi yetakchi turistik kompaniyalar, joylashtirish vositalari hamda turizm va xizmat ko‘rsatish sohasidagi boshqa tadbirkorlik subyektlari, shuningdek, 2500 dan ortiq mehmonlar ishtirok etishdi.

Tadbir doirasida milliy hunarmandchilik mahsulotlari, turistik korxonalar hamda joylashtirish vositalarining imkoniyatlarini namoyish etuvchi taqdimotlar o‘tkazildi. Shuningdek, soha vakillari o‘rtasida B2B (tadbirkor-tadbirkor) va B2C (tadbirkor-mimjoz) mexanizmlari asosida uchrashuvlar tashkil etilib, tajriba almashish va hamkorlik masalalari muhokama qilindi.

Tadbir yakunida yarmarkada faol qatnashgan ishtirokchilarga tashakkurnomalar va esdalik sovg‘alari topshirildi.

"Euronews" telekanalida turizmni rivojlantirishda muhim ahamiyatga ega bo‘lgan "Ipak yo‘li sarguzashtlari" ko‘rsatuvi namoyish etildi.

Ko‘rsatuvda Ipak yo‘lining eng muhim manzilgohlariga, jumladan mashhur Samarqand shahriga sayohatlar va ularning madaniy xususiyatlariga e’tibor qaratilgan. Unda O‘zbekistonning asosiy sayyohlik maskani hisoblangan Registon maydoni kabi tarixiy yodgorliklar haqida batafsil ma’lumot berilgan. Mintaqaning hunarmandchiligi va oshpazlik san’ati bilan bog‘liq an’analarga, xususan qog‘oz tayyorlash va Samarqand nonini yopish jarayonlariga alohida e’tibor berilgan. Bu esa tomoshabinlarga mahalliy madaniyatning o‘ziga xosligini chuqurroq anglashga yordam beradi.

"Ipak yo‘li sarguzashtlari" singari ko‘rsatuvlar sayyohlarni jalb etishda muhim ahamiyat kasb etadi. Ular tomoshabinlarga nafaqat mintaqaning tarixiy merosini namoyish etadi, balki sayohat uchun real marshrutlarni ham taqdim qiladi. Bunday ajoyib joylar va an’analar haqidagi hikoyalar tomoshabinlarda dunyoning bu betakror go‘shalariga tashrif buyurish istagini uyg‘otishga ko‘maklashadi. O‘z navbatida, bu turizmning rivojlanishiga turtki bo‘ladi, chunki bunday dasturlar yangi yo‘nalishlarga qiziqishni rag‘batlantiradi, infratuzilmani takomillashtirish jarayonini qo‘llab-quvvatlaydi hamda mintaqaning sayyohlarga mo‘ljallangan iqtisodiyoti uchun qo‘shimcha imkoniyatlar yaratadi.

Registon Ansambli direksiyasi sizlarni Navro‘zi olam bilan muborakbod etadi! Ushbu qadimiy va ardoqli ayyom tabiatning uyg‘onishi, yangilanish va yaratuvchanlik ramzi sifatida dillarga quvonch, yurtdoshlarimizga ezgu niyatlar olib kelsin.

Navro‘z barchamiz uchun hamjihatlik, mehr-oqibat va barkamol hayot sari ilhom manbaiga aylanib, har bir xonadonga fayzu baraka, tinchlik va farovonlik keltirsin!

Registon360.uz platformasi ushbu tarixiy yodgorlik bilan yaqindan tanishish, betakror me’moriy detallarni batafsil ko‘rib chiqish imkonini beradi. 360° panoramik tasvirlar esa sizga me’moriy majmuaning o‘zida bo‘lgandek his qilish imkoniyatini yaratadi.

Samarqand – Yangi O‘zbekistonning turizm darvozasi! Ana shu shior ostida mamlakatimiz bo‘ylab Samarqand viloyatining turizm salohiyatini keng targ‘ib qilishga qaratilgan taqdimot tadbirlari tashkil etilmoqda. Ushbu loyiha O‘zbekiston Respublikasi Prezidentining "Samarqand viloyatida investitsiya va tadbirkorlik muhitini yanada rivojlantirish hamda aholi turmush darajasini yaxshilash chora-tadbirlari to'g'risida" gi PQ-407-sonli qarori hamda ushbu qaror asosida tasdiqlangan Samarqand viloyat hokimligining tegishli reja-grafigi ijrosini ta’minlash maqsadida amalga oshirilmoqda.

Joriy yilning 18-fevral kuni Toshkent viloyatida turizm sohasi vakillari – Turizm boshqarmasi mutasaddilari, tur operatorlar va soha tadbirkorlari ishtirokida Samarqand viloyatining sayyohlik imkoniyatlari, yangi turizm yo‘nalishlari hamda turizm qishloqlari bo‘yicha taqdimot bo‘lib o‘tdi.

Tadbir davomida ishtirokchilarga Samarqandning boy tarixi, madaniy merosi va zamonaviy turistik infratuzilmasi haqida batafsil ma’lumot berildi. Yangi turistik yo‘nalishlar, ekologik va gastronomik turizm imkoniyatlari tanishtirilib, xalqaro mehmonxonalar, transport qulayliklari va zamonaviy sayyohlik loyihalari haqida ma’lumot taqdim etildi.

Tadbir yakunida turizm sohasi vakillari o‘zaro fikr almashib, hamkorlik istiqbollarini muhokama qildilar. Samarqand viloyati bilan turizm sohasida yaqin hamkorlik qilish, yangi loyihalarni ishlab chiqish va ichki sayyohlar oqimini yanada oshirish bo‘yicha takliflar bildirildi.

Mazkur taqdimotlar 19-20-fevral kunlari Jizzax hamda Sirdaryo viloyatilarida ham o'tkazilishi rejalashtirilgan.

“BBC Travel” global media portali ma’lumotlariga ko‘ra, O‘zbekiston 2025-yilda sayohat qilish uchun eng yaxshi 25 ta yo‘nalish ro‘yxatiga kirdi.

Maqolada ta’kidlanishicha, turizm O‘zbekistonning o‘ziga xos an’analari va madaniy merosini saqlash strategiyasining muhim qismiga aylanib bormoqda. Mamlakat infratuzilmani jadal rivojlantirmoqda: yangi mehmonxonalar, yuqori tezlikdagi temir yo‘l marshrutlari, ichki aviareyslar va yangilangan madaniy diqqatga sazovor joylar sayohatchilar uchun betakror imkoniyatlarni yaratmoqda. Bularning barchasi iqtisodiy o‘sishni rag‘batlantirishga va O‘zbekiston tarixiy va madaniy merosining cheksiz boyligini kashf etayotgan sayyohlarni jalb qilishga yordam bermoqda.

90 dan ortiq mamlakatning, jumladan Buyuk Britaniya, Kanada va Avstraliya fuqarolari O‘zbekistonga vizasiz tashrif buyurishlari mumkinligi sayohatni sezilarli darajada osonlashtiradi va sayyohlar uchun yangi imkoniyatlar eshigini ochadi, deyiladi xabarda.

Bundan tashqari, qo‘shni mamlakatlar bilan chegarani kesib o‘tish ancha osonlashdi. 2024-yil noyabr oyida Qozog‘iston va O‘zbekistonni bog‘lovchi "Ipak yo‘li temir yo‘l sayyohati" nomli birinchi xalqaro temir yo‘l yo‘nalishi ishga tushirildi. Bu qulay yo‘nalish sayyohlarga Buyuk Ipak yo‘li izidan borib, har ikki davlatning noyob tarixiy va madaniy diqqatga sazovor joylarini bemalol o‘rganish imkonini beradi. Bunday sayohat nafaqat qadimiy savdo va madaniy almashuvlar muhitiga sho‘ng‘ish, balki mintaqada madaniy aloqalarni kengaytirish va turizmni rivojlantirish uchun yangi imkoniyatlar yaratadi, deb xulosa qiladi “BBC Travel”.

Ta’kidlash joizki, ro‘yxatga AQSH, Kanada, Yaponiya, Italiya, Avstraliya, Marokash, Angliya va boshqa davlatlar ham kiritilgan.

Sizni yangi yilingiz bilan tabriklaymiz! 2025 yil yangi maqsadlar, yangi imkoniyatlar, yangi g'alabalar yili bo'lsin!

Sizga sihat — salomatlik va farovonlik, oilalaringizga tinchlik va osoyishtalik tilaymiz!

Eng yaxshi tilaklar bilan Registon ansambli direktsiyasi