Samarqandda Registon maydonida O‘zbekiston Respublikasining Davlat bayrog‘i qabul qilinganining 33 yilligiga bag'ishlangan tadbirlar bo'lib o'tdi.

Askarlar, yosh sportchilar, kavaleristlar, ichki ishlar boshqarmasi va Milliy gvardiya xodimlari 20x40 metr o'lchamdagi bayroq bilan Kuksaroy maydoniga qarab harakat qilishdi.

AQShning O‘zbekistondagi elchixonasi Samarqadning Registon maydonidagi Sherdor madrasasida konservatsiya va restavratsiya ishlarini amalga oshirishga qaratilgan loyihani qo‘llab-quvvatlaydi, deya xabar bermoqda “Gazeta.uz”.

Qayd etilishicha, elchixona uni amalga oshirishda Madaniy meros agentligi hamda Madaniyat va san’atni rivojlantirish jamg‘armasi bilan hamkorlik qiladi. 500 000 dollar miqdordagi mazkur tashabbusni Markaziy Osiyo tadqiqotlari xalqaro instituti (IICAS) texnik tomondan qo‘llab-quvvatlaydi.

Madaniy meros agentligi IICAS ko‘magida Sherdor madrasasi fasadi konservatsiya va restavratsiyasini mahalliy hunarmandlar va mutaxassislarni jalb qilish orqali amalga oshiradi. Loyiha sifati va samaradorligini oshirish uchun xorijlik mutaxassislar ham taklif etiladi.

Loyiha hamkorlari agentlikni dunyoning yetakchi olimlari bilan bog‘lashadi, madaniy merosni saqlash uchun zarur hujjat va resurslarga ega bo‘lish imkonini yaratishadi hamda loyiha davomida qo‘lga kiritilgan ilmiy xulosalarni keng tarqatishda yordam berishadi, deyiladi xabarda.

Agentlik taqdim etgan loyiha butun dunyo bo‘ylab o‘tkazilgan saralash bosqichida tanlab olinib “bu yil uchun eng katta, tanlov tarixida esa O‘zbekiston uchun eng yirik summani” tashkil etadi. Grant AQSh Madaniy merosni asrab-avaylash jamg‘armasi (AFCP) O‘zbekistonda qo‘llab-quvvatlayotgan 14-loyiha hisoblanadi.

“Ushbu sa’y-harakatlar bu muhim yodgorlikni kelgusi avlodlar va butun insoniyat uchun saqlab qolishda yordam beradi. Bunday hamkorlik ikki mamlakat o‘rtasidagi aloqalarni mustahkamlash, shuningdek, bu muhim yodgorlikni asrab qolish va O‘zbekistonning madaniy merosini himoya qilishga katta hissa qo‘shadi”, — dedi AQShning O‘zbekistondagi elchisi Jonatan Henik.

Hozirgacha O‘zbekistonda AFCP yordamida umumiy qiymati 1 350 000 dollar bo‘lgan xilma-xil loyihalar amalga oshirilgan. Bu galgi yangi loyiha 2023-yilda O‘zbekiston va Qo‘shma Shtatlar o‘rtasida madaniy merosni muhofaza qilish bo‘yicha imzolangan ikki tomonlama kelishuvda ko‘zda tutilgan maqsadlarga hamohangdir, deyiladi xabarda.

Ma’lumot uchun, 2001-yilda AQSh Kongressi tomonidan tashkil etilib, AQSh Davlat departamenti boshqaradigan Madaniy merosni asrab-avaylash jamg‘armasi dunyoning rivojlanayotgan mamlakatlarida madaniy yodgorliklarni, madaniy obyektlar va to‘plamlarni hamda an’anaviy madaniy me’rosni saqlashga doir loyihalarga bevosita grantlar taqdim etadi.

2024-yilgi global grantlar tanloviga 71 mamlakatdan 149 ta madaniy merosni saqlash loyihasi taqdim etilgan.

Germaniyaning "CTOUR" jurnalida O‘zbekiston haqidagi ko‘plab sayyohlik qo‘llanmalari muallifi, fotograf Karsten Bodo Tyonsning "Ipak yo‘li" markazida sharqona musiqa festivali" sarlavhali maqolasi e’lon qilindi.

Muallif Bodo Tyons o‘quvchilarni Samarqandning madaniy va tarixiy merosini o‘rganishga taklif qiladi. Uning yozishicha, shahar har bir sayyoh uchun O‘zbekistondagi eng muhim manzillardan biridir. 2700 yildan oriq tarixga ega bo‘lgan bu qadimiy shahar xalqaro anjumanlar va madaniy tadbirlar, jumladan, "Sharq taronalari" kabi nufuzli xalq musiqasi festivali uchun muhim markazga aylanib ulgurgan. Shu o‘rinda muallif, joriy yilning sentyabr oyida Germaniya Federal kansleri Olaf Sholsning mamlakatimizga rasmiy tashrifi ham ushbu shaharda bo‘lib o‘tganini ta’kidlagan.

Bejirim suratlar bilan boyitilgan maqolada 2016 yildan keyin O‘zbekistondagi o‘zgarishlarga alohida e’tibor qaratilgan. "Mamlakat o‘zining turistik jozibadorligini oshirish maqsadida turizm infratuzilmasiga katta sarmoya kiritib, yangi turistik hududlarni rivojlantirmoqda. Samarqand shahri yaqinida barpo etilgan zamonaviy, ko‘p qirrali "Silk Road Samarkand" majmuasi aynan shu maqsadga xizmat qiladi. Bu majmua sun’iy kanal atrofida joylashgan bo‘lib, bugun ShHT va YuNVTO Bosh Assambleyasining 25-sessiyasi kabi katta xalqaro anjumanlar, yirik xalqaro tashkilotlarining sammitlari hamda yirik sport musobaqalariga mezbonlik qilmoqda", – deya qayd etgan muallif.

Bugun afsonaviy Samarqand dunyodagi nufuzli tashkilotlarning uchrashuv joyiga aylandi. Mehmonlar bu yerda zamonaviy mehmonxonalar, ovqatlanish va dam olish majmualarini o‘zida mujassam etgan tarixiy ko‘rinishdagi "Boqiy shahar"ga tashrif buyurish imkoniyatiga egalar.

Nemis nashri madaniy va sayyohlik hayotining markazi bo‘lgan mashhur Registon maydoniga alohida urg‘u bergan. Maqola muallifi bu mo‘’jizaviy maydonga ta’rif berish uchun taniqli britaniyalik sayohatchi, davlat arbobi Jorj Kerzonning Registon haqidagi ta’rifini keltiradi: "Registon hatto Yevropada ham qiyosi yo‘q dunyodagi eng hashamatli maydondir".

Shuningdek, muallif, Amir Temur va uning nabirasi Mirzo Ulug‘bek qoldirgan moddiy va ma’naviy meros haqida ham batafsil to‘xtalgan.

"1997 yildan buyon aynan shu maydonda YuNESKO hamkorligida "Sharq taronalari" festivali o‘tkazib kelinmoqda. 2024 yilning avgust oyida, pandemiya sababli yuzaga kelgan besh yillik tanaffusdan so‘ng, festival yana tashkil etilib, butun dunyodan ishtirokchilarni yig‘di. Yevropadan, Osiyodan va hatto Afrikadan kelgan ishtirokchilar milliy musiqa va nafis raqs namoyishlarini guvoh bo‘ldilar", – deb ta’kidlagan u.

Muallif Samarqand O‘zbekistonning boshqa shaharlari orasida o‘ziga xos o‘rin tutishini, chunki bu yerda tarixiy meros va zamonaviy turistik infratuzilma ajoyib tarzda uyg‘unlashganini ma’lum qilgan. Bodo Tyons, shuningdek, shaharni xalqaro hamjamiyat uchun jozibali madaniy va sayyohlik markazi sifatida mohirona tasvirlaydi va ushbu festivalni keng jamoatchilik uchun yanada ham ommabop qilish zarurligini ta’kidlagan, deya xabar beradi  "Dunyo" AA..

O‘zbekiston Respublikasi Prezidenti Shavkat Mirziyoyev mamlakatimizga rasmiy tashrif bilan kelgan Germaniya Federal Kansleri Olaf Sholsni Registon maydonida kutib oldi.

Mamlakatimizning asosiy timsollaridan biri, ajdodlarimiz bunyodkorlik salohiyatining ifodasi – dunyoga mashhur Registon maydoni YUNЕSKOning Butunjahon merosi ro‘yxatiga kiritilgan. Ansamblga kiruvchi Mirzo Ulug‘bek, Sherdor va Tillakori madrasalari o‘zining salobati, boy tarixi va betakror arxitekturasi bilan barchada chuqur taassurot qoldiradi.

Oliy martabali mehmonga Sharq me’morchiligining ushbu durdonasi qurilishiga oid tarixiy ma’lumotlar, yechimlar va bezaklarning o‘ziga xos xususiyatlari, shuningdek, bu maskan bilan bog‘liq muhim voqealar va shaxslar, o‘zbek xalqining madaniy merosi haqida ma’lumot berildi.

Suhbat davomida jahon sivilizatsiyasining qadimiy beshiklaridan biri sifatida haqli ravishda e’tirof etilgan Samarqand shahri bugungi kunda ishbilarmonlik va sayyohlik markaziga aylanib borayotgani ta’kidlandi.

Shavkat Mirziyoyev va Olaf Shols Registon ansambli oldida birgalikda suratga tushdilar.

O'zbekistonning birinchi Prezidenti Islom Karimov Samarqand shahri kunini 1996 yil 18 oktyabrda Amir Temur tavalludining 660 yilligiga bag'ishlangan marosimda nishonlashni taklif qildi. O'sha kuni shaharga Amir Temur ordeni topshirildi va bu sana endi har yili keng nishonlanadi.

Samarqand jahon tsivilizatsiyasining eng yirik markazlaridan biridir. Taxminan uch ming yillik tarixga ega bu shahar ilm-fan, savdo va hunarmandchilik markazi sifatida tanilgan.

Amir Temur va Temuriylar hukmronligi davrida Samarqand mintaqaning yirik iqtisodiy, siyosiy va madaniy markaziga aylandi. Shaharda ko'plab madrasalar va masjidlar, bog'lar va saroylar, savdo va hunarmandchilik inshootlari qurilgan. Ushbu yodgorliklarning aksariyati hozirgi kungacha saqlanib qolgan. YUNESKOning 25-sessiyasida Samarqandning bir qator me'moriy-tarixiy va boshqa yodgorliklari jahon merosi ro'yxatiga kiritildi.

O'z navbatida, shahrimizning barcha aholisi va mehmonlarini Samarqand shahri kuni bilan tabriklaymiz! Har bir uyda tinchlik, farovonlik bo'lishini tilaymiz. Har bir oilada sog'liq va baxt. Va shahar-o'sish va rivojlanish uchun ajoyib imkoniyatlar!

O‘zbekiston Respublikasi Prezidenti Shavkat Mirziyoyev 26-avgust kuni “Sharq taronalari” o‘n uchinchi xalqaro musiqa festivalining tantanali ochilish marosimida ishtirok etdi.

Davlatimiz rahbari nutqining avvalida mehmonlarni ko‘rishdan mamnunligini bildirib, ularga xalqimizning salomi va ezgu tilaklarini yetkazdi. “Sharq taronalari” festivali, mohiyat e’tiboriga ko‘ra, bugungi kunda “jahon taronalari” anjumaniga aylanganini ta’kidladi.

- O‘tgan davr mobaynida Samarqandning yulduzli osmoni ostida qanchadan-qancha sehrli navolar, hayotbaxsh ohanglar yangradi. Ko‘hna Sharq bag‘rida tug‘ilgan musiqiy qadriyatlar anjumanimiz tufayli xalqaro miqyosda keng e’tibor va e’tirof qozondi. Festival o‘nlab mahoratli xonanda va sozandalarni, iste’dodli yoshlarni kashf etdi, ularning parvoziga qanot, ijodiga kuch va ilhom bag‘ishladi, - dedi Shavkat Mirziyoyev.

So‘nggi yillarda mamlakatimizda bunday anjumanlar ko‘paydi. Maqom, baxshichilik, folklor va raqs san’ati, hunarmandchilik festivallari kabi xalqaro madaniy tadbirlar muntazam o‘tkazib kelinmoqda. Bular O‘zbekistonning jahon ahlini tinchlik-totuvlikka, qardoshlik va ahillikka chaqiradigan ezgu da’vati ekani qayd etildi.

- Notinch va tahlikali zamonda azaliy qadriyatlarni, odamiylik qiyofasini saqlab qolish tobora mushkul bo‘lib bormoqda. Mana shunday murakkab vaziyatda ilohiy sarchashmalardan quvvat olib, vaqt va makon chegaralari osha gumanistik ideallarni tarannum etadigan asl san’at, musiqa va adabiyot xaloskor kuch bo‘lib maydonga chiqishi zarur, - dedi O‘zbekiston Prezidenti.

Davlatimiz rahbari xalqlar o‘rtasida do‘stlik va ahillikni mustahkamlash, musiqiy merosni o‘rganish va kelgusi avlodlarga yetkazish masalalariga e’tibor qaratdi. Shu nuqtayi nazardan, “Sharq taronalari” festivali tarixi va musiqa madaniyatiga doir ma’lumotlarni o‘zida mujassam etadigan alohida ensiklopediya va uning virtual shaklini yaratish, anjumanning xalqaro “Do‘stlar klubi”ni tashkil etish tashabbusi ilgari surildi. Festivalning g‘olib va sovrindorlari ishtirokida dunyo mamlakatlarining nufuzli sahnalarida konsert dasturlarini o‘tkazish taklifi bildirildi.

Marosimda YUNЕSKO, TURKSOY, Turkiy madaniyat va meros fondi, Mustaqil Davlatlar Hamdo‘stligi va boshqa tashkilotlardan faxriy mehmonlar ishtirok etdi. Umuman, bu yilgi festivalda 80 ga yaqin davlatdan 400 nafardan ziyod san’atkor  va olimlar qatnashmoqda.

Festival doirasida “Sharq xalqlari musiqa madaniyati: globallashuv jarayonlarida ijodiy uyg‘unlashuv tamoyillari” mavzusidagi xalqaro ilmiy-amaliy konferensiya ham bo‘lib o‘tadi.